廿一由八

营业中

休息中

情人节未有情人，于是同朋友去咗喱间隐世又Chill爆嘅「廿一由八」享受吓单身嘅浪漫。初时以为好偏僻，点知原来喺香港大学对面过条马路行3分钟左右就到。Cafe 装潢以木为主，大型落地玻璃加埋几棵中型植物，感觉悠闲写意非常舒服。坐底睇睇餐牌好快就决定嗌个 DUET SET 二人套餐，拣咗「巴马火腿忌廉芝士果仁卷」，「进击的美式孖酱炸鸡汉堡」，「美国肉眼扒配时蔬及压薯」，仲追加咗个甜品「枫糖碧根脆脆」。果仁卷口感Creamy咸咸地有微少Rum酒味非常特别冇得输。炸鸡汉堡两块炸鸡好厚超大块肉汁非常丰富。肉眼扒嘅配菜种类多压薯煎得几香。个脆脆其实系 French Toast，有个云尼拿雪糕球喺上面卖相几好，厚多士外微脆内松软仲有非常浓厚嘅...玉桂味，真系超邪恶。为咗中和吓，最后嗌咗杯热Latte，上面个拉花应该系...梵高个徒弟拉嘅，都...几有创意吖。非常欣赏「廿一由八」嘅店内环境和家私，特别系张梳化坐得我好舒服，食物质素唔差，日后一定会再拜访。