三人行燒烤專門店

营业中

休息中

三人行係旺角新開嘅平民燒烤店，豬牛羊雞海鮮蔬菜都有，大部份肉類串燒都係十幾蚊有交易，而且仲唔係食兩啖就冇，因為性價比高，所以都幾多人幫趁。當日六點去到，已經有兩枱人喺度，仲諗住唔太多人，點知後尾都越黎越多人。店面簡單，不過都乾淨企理。燒菠蘿($16) - 香甜多汁又冇渣，仲預先去左皮同切好一件件，方便食，抵讚！燒白鱔($48) - 白鱔幾厚肉，鱔皮燒到脆脆地，肉質扎實彈口。雞軟骨($16) - 一串都幾多粒，脆卜卜唔會太硬。羊肉串($16)安格斯牛肋串($24) & 牛柳串($18) - 兩款牛肉都唔會燒到乾柴柴，食落好軟嫩juicy。炸薯格($30) - 薯格好大份，香脆得黎又有咬口，仲唔會過油，食到停唔倒口。鹽燒馬友($126) - 馬友燒到啱啱好，肉質唔會太老太鞋，蘸埋個酸辣汁食，非常開胃。牛油金針菇($32) - 金菇索晒啲牛油，好香牛油味，不過建議盡快食，否則越浸越鹹。蒜蓉燒原條茄子($36) - 茄子好大條，上面放左好多辣粉同蒜蓉，非常惹味。總結，雖然只係一間街坊燒烤店，但出奇地高質，串燒惹味又唔太乾，食完亦唔會特別口渴，人均$200已經食到飽，性偵比非常高。