+5ºC 手抓餅專門店 (已結業)

+5度门面好细，好彩前面系个大空地，有好多位可以俾人等拎嘢食饼底16蚊，有最低消费：每个饼计算最少30蚊起。（记得拣够30蚊先俾单，唔系姐姐会串你hahaha）食手抓饼无论喺台湾定香港，加鸡蛋同芝士系指定动作，但计完数发现系29蚊🤡见争1蚊就加埋个肉松试下。沙律酱或辣椒粉就可以免费加。多数D人买完就会走咗去，我因为八卦就留喺到等，顺便睇佢整。一日都唔知要整几多份，个哥哥已经非常熟手，见到佢D材料都落得好平均。完成一份佢会叫号码然后同你讲多谢哂，见到佢煎到身水身汗我都想同佢讲返多谢哂。等咗15分钟左右就有得拎。岩岩拎上手好热，第一啖未食到其他食材，净系咬到饼底。饼底好高质，松化得黎表面煎到好脆。大概大大啖第3口就会开始食到配菜，芝士因为饼底夹住咗，热力岩岩好令佢溶哂。鸡蛋加肉松，真系好台湾。总括黎讲：唔好对比台湾嘅物价，30几蚊喺香港买到台湾嘅味道，抵唔抵就见人见智啦。