飯丸屋 (D2 Place TWO) (已結業)

長沙灣D2 place 開左間食新式手卷的鋪，好有沖繩美國村的風味。食一個輕下午茶係一個唔錯選擇。不過要食都要等一等，因為佢係即叫即做，假日大約等5-10分鐘。咖喱可樂餅手卷：佢入面嘅餡係好多，比例做得出色，雖然一啖係好大好難咬晒。但每一啖都食到啲餡，咬開個可樂餅，有咖喱味流出，都算鬆脆。再配上芝士同埋雞蛋，每一啖都食得好幸福。明太子干貝手卷：明太子醬有好多，所以每一啖都可以食到明太子醬。炸帶子炸得香脆可口，咬落去嘅口感好好，配上餐肉同雞蛋芝士，冇得輸。+$13有杯飲品黑芝麻豆漿：有芝麻味但係又唔會蓋過豆漿，唔錯。日式抹茶豆漿：抹茶本身就冇得輸啦，再配上帶有甜味嘅豆漿，呢杯係抹茶拿鐵嘅代替品。如果有多D bar table 可以比食客就更好啦。