亞金南洋茶室 (黃大仙中心南館)

营业中

休息中

不嬲都钟意食东南亚菜，尤其钟意食星加坡同马来西亚菜。呢度个招牌喇沙，汤底好有椰香味，够晒浓郁，有少少辣。配料又够多，有虾、蟹棒、鱼片头、豆卜等。最正系面底可以拣渗渗，即系一次过可以食晒油面同米粉，啲面索晒汤底d椰香味，超级惹味，食到最尾，真系连汤底都饮埋。除咗喇沙之外，肉骨茶都系好推介，用一个砂锅上，有2人份量，配2碗白饭同一条油条，肉骨茶药材味够，入面嘅材料超级丰富，一字骨、猪肚、猪手、腩肉、鸡脚，啲肉全部都好入味，煮得够腍，个汤底真系好好饮，如果可以再多啲汤就好啦。我哋仲叫咗几个小食，虾饼厚度适中，肉质弹牙，个皮又炸得够脆。而鲜牛油咖央多士，多士啱啱烘起，热辣辣，脆卜卜，咖央唔会太甜，味道啱啱好，再加埋超厚嘅牛油，一食落口入口即溶，真系好想encore！呢度仲有个几特别嘅玻璃鱿鱼通菜，啲鱿鱼好弹牙，通菜够新鲜，唔会好老，碟通菜用咗秘制嘅酱汁去炒，好惹味！