八一蕃巴蜀烤魚店 (砵蘭街) (已結業)

最近眼見朋友好多都上大陸食烤魚，心思思想搵吓香港有咩餐廳食烤魚，搵到呢間主打唔同味道嘅川式烤魚，見到佢可以揀唔同辣度，價錢又合理就一於試吓。餐廳好近地鐵站，好方便。除咗烤魚仲有好多唔同特色串燒可以食，仲可以加唔同配料喺烤魚到添，種類好多，適合唔同口味嘅客人。🎈蕃茄味烤魚 （海鱸魚）$318由於近排天氣超級熱，所以就唔特別食辣，就揀咗蕃茄味嘅。烤魚上枱嘅時候，有少少俾佢嚇親，好大盆😂魚上面有好多唔同嘅配菜，例如京蔥、芫荽、腐竹、寬粉、芽菜、腐皮等等。今次揀咗海鱸魚，魚質地好厚身，而且比較少骨，適合唔鍾意lure骨嘅朋友。配上蕃茄味嘅湯底，好突出到魚既鮮味。其中寬粉真係超級好食，寬粉索晒蕃茄味嘅湯底，煙煙韌韌，好有咬口，有機會嘅話下次會另外再叫一碟。🎈鵝腸 $58除咗烤魚之外，仲另外叫咗一碟鵝腸，份量都幾多，而且估唔到同蕃茄味幾夾。好似平時打邊爐咁淥一淥就得，口感爽脆，相當唔錯。🎈蘋果茶$59味道酸酸甜甜，好開胃，而且食完烤魚再飲一啖，好解膩。