米子燒肉家 (已結業)

行完山落咗嚟粉岭，本来谂住是但食啲嘢，点知又畀我哋喺粉岭中心揾到间新开嘅日本料理「米子烧肉家」。店内装潢以木色系为主调，近门口位置设有半落地大玻璃，环境开扬阔落，感觉雅致舒服，反正还没想到吃什么，就一于喺呢度开餐。先睇餐牌，原来店舖除咗主打日式烧肉外，仲有好多唔同款式嘅丼饭供应。点咗五目牛肉盛丼 ($88) 同 蒲烧鳗牛载 ($92)。每款丼饭均奉送日式冷泡茶饮一杯。两个烧肉丼都好有睇头，面头铺满了食材，大大碗、份量十足。五目牛肉丼选用了肩胛 PRIME 牛肉炮制，食落牛味好突出，入口带点焦香，而且生熟度亦控制得啱啱好，非常 Juicy！另外配料方面亦唔马虎，有温泉蛋、日式大紫菜、洋葱丝、干椒丝、葱花等，将温泉蛋戳破，让蛋汁慢慢流出，以米饭、牛汁及配料伴吃，味道一流！至于另一客蒲烧鳗牛载，用料亦非常丰富，除咗半条鳗鱼，另外仲有好多块牛肉，而配料方面就有日式大紫菜、葱花同蛋丝等。鳗鱼烧得外脆内嫩，肉质细致，入口油润肥美，配上微甜嘅鳗鱼汁，拌饭吃特别惹味。牛肉都好有水准，肉质腍身，食落无渣。