廚十三老壇酸菜魚 (渣甸街) (已結業)

早前有朋友推荐我试吓依间喺铜锣湾嘅酸菜鱼餐厅，仲话绝对唔会令我失望！餐厅整体唔系好大间，但系环境绝对干净。仲安排咗我哋坐梳化位，非常舒服嘅！嚟到就梗系要食酸菜鱼啦，我哋两个人就叫咗一个细嘅，另外仲有中size同埋大size嘅。话就话细份，但系份量绝对唔细！佢除咗有劲多我最爱嘅酸菜之外，鱼嘅份量亦都好多！所以两个人食一定有突！酸菜鱼仲可以俾我哋加配料，我哋就加咗午餐肉同埋宽粉。午餐肉就都系正常水准，宽粉就超弹牙，同酸菜鱼个汤好夹！讲返个酸菜鱼先，我觉得酸菜鱼最重要系个汤底够酸，而佢就绝对做到。另外麻嘅味道亦都好足够，绝对系有平时喺内地食嘅酸菜鱼嘅水准，甚至可以话系超越某啲舖头添！另外我哋仲叫咗糍粑小食 ，唔知大家有冇食过。佢系有少少似炸咗嘅麻薯咁，外脆入面就QQ嘅，仲会有啲黑糖俾你点嚟食。我同我朋友就十分之钟意！嘢饮方面就叫咗两杯特饮，分别系荔枝梳打同埋提子梳打，唔会太甜又大杯！ 虽然依间餐厅价钱可能比平时内地食嘅酸菜鱼贵少少，但我觉得以餐厅环境同埋食物质素来讲，绝对对得住呢个价钱！叫埋三五知己嚟倾偈慢慢食就最啱啦～