Munch (已結業)

男朋友生日，佢想食西餐，上openrice揾到哩间餐厅，之后book台，book窗口位，顺便book埋甜品，因为可以写上男朋友个名，希望比惊喜佢。上到去环境唔错，好有情调，适合情侣。今次点咗蜜瓜火腿，蟹饼，鸭肶意大利饭同大虾牛扒，我仲点左香蕉杂果沙冰。蜜瓜火腿一般，蜜瓜唔算甜，火腿有d过咸。蟹饼好味，啖啖蟹肉，外面脆入面多汁，加埋个汁一齐食更好味，个汁酸酸地，令蟹味更出。鸭肶意大利饭又系一个好味之选，鸭肶外皮好松脆，但唔油，鸭肶肉好嫩，一d都唔鞋，仲有味道啱好唔会太咸，但个饭好浓芝士味，好易腻。另外，大虾牛扒必食，大虾煎到好香口，肉质弹牙，牛扒要咗半熟，外面煎到有少少脆口，入面仲保持到半熟，切开见到有牛肉汁流出，但唔会有血水，肉质好嫩无渣，好有肉味，好好味。杯沙冰都唔错，食到果肉，味道天然。