茶木‧台式休閒餐廳 (已結業)

话说今晚同爸妈、BB去中环茶木食晚饭，店员收餐具时唔小心倒泻咗成碗蕃茄汤落我身度，好彩只系整到BB少少，我挂住先抹好张梳化凳，怕BB整到乌糟晒，我先再企喺身处理自己条裙，白色底印花裙染晒蕃茄色。女店员过来慰问我，仲拎件公司制服俾我，因为我件衫只系沾到少少蕃茄汤，所以我话唔驶啦。几个职员慰问咗我，我都笑笑口答唔紧要，因为我觉得人人喺工作上都会有犯错既时候，食完饭喺lift口竟然撞到女店员，原来佢落左去Topshop买咗条牛仔裙俾我换，我话唔驶啦，但佢话因为佢地整乌糟咗我条裙，而且又已经买咗，叫我快d换咗去。我换好之后，亚爸话佢去柜面埋单时，店员叫我地等一阵，话佢地女店员落咗去买裙俾我，最后仲免费埋我地个甜品。真心想赞下茶木所有员工，多谢佢地为咗我条裙安排咗咁多野，仲有希望果个同事仔唔会俾人闹啦，其实我无嬲、无闹、亦无嘈，因为我都有个小朋友，我希望佢大个时，工作上犯错都一样会有人原谅同包容。希望呢个同事仔都唔好再内咎，亦多谢中环茶木上下员工既热心帮助。