大中華飯店 (已搬遷) 新店位置

话说今日同屋企人四个喺港岛区玩完之后，大家心血来潮见咁早，又趁平日啲人未咁早放工，就拿拿声去长沙湾一直想食嘅大中华啤一啤佢，去到大约七点左加，人流好彩唔算多，所以都好快揾到位坐。首先一嚟就当然两支啤啤佢先啦... 听人讲呢间嘢好出名，撞正我哋都好耐无食过大排档，咁就啱喇，最后叫咗四个小菜四个人食：椒盐骨拼酥炸大肠、小炒王、烧鹅半只、椒盐白饭鱼、白饭，我谂都好够。因为客唔多，所以啲嘢食好快都陆续上枱喇~~~ 首先一黎烧鹅半只，见到佢卖相都唔错，已经急不及待试下，佢嘅烧鹅卖相都几靓仔，但入口时外皮唔算脆身比较偏淋，而肉质我觉得一般未算去到好好食，可能前𠮶排试过喺荃湾一间几出名嘅烧味铺试过佢个烧鹅，有用荔枝柴去烧，所以真系香得黎又皮脆肉嫩，不过唔紧要啦，味道都算唔错。跟手到小炒王，基本上每个大排档都有佢独特嘅小炒王，呢间嘅小炒王有韭菜花、腰果、有的菇同鱼仔等等，炒得都好够镬气都好好食，而且即叫即炒好够热，送饭一流，不过如果有大大条嘅虾干就更加正。之后到椒盐骨并炸大肠，呢个双拼份量恰到好处，又唔会太大碟惊食唔晒，所以呢个份量啱啱好，椒盐骨好食，都话永远即炸即食系最香口，佢就做到呢个效果，好食!