Fusion Menu (已結業)

话说呢间餐厅都开咗一排，但一路都冇时间食，恰巧个日咁岩赶时间而且得呢度有位，故一尝之。入到去个装潢都颇西，电视播紧外国节目，墙上面既黑板就写住厨师推介同是日午餐等等。个侍应哥哥仲好热情地介绍当日厨房有咩靓。由于时间关系就点咗两个set lunch，有忌廉汁香草鸡扒跟饭同埋鲜茄焗猪柳饭，各自再加12蚊跟餐，就跟磨菇汤、蒜蓉包同餐饮。首先黎到既就系个汤同个包，个汤呢...食落去竟然有点类似豆蓉既渣，同个汤格格不入，而且令到个汤好青，反而冇咩忌廉味。个包就系全餐最满意既位，香口又松脆。接著就系香草鸡扒饭，食落会令你仿佛自己系大长金一样，过足韩星瘾。唔系因为外表似足李英爱，而系你会怀疑自己系咪好似长金咁失去咗味觉。有画冇味，实捉到鹿但又唔晓得点脱角，有点失望。到到鲜茄焗猪柳饭，即叫即焗热辣辣，猪柳亦预先切好方便食用，不过呢...个饭实在太多茄，当食饭时如果连埋个茄入口既位，本身既味道就会俾蕃茄冲淡晒。可取之处就系饭面上既芝士，香口而有口感。呢间餐厅，实有令人恨铁不成钢之感矣。