老厝邊

营业中

休息中

今晚嚟到佐敦嘅台湾餐厅「老厝边」，试吓佢哋嘅台式晚餐，果然冇令我失望。从主食到饮品，每一道都充满台湾味道，令人回味无穷。先讲我最钟意嘅超浓芋泥蛋饼，呢款蛋饼真系令人一试难忘。入面嘅芋泥馅料满满，质地幼滑香甜，仲有肉松嘅咸香提升整体层次。外层嘅蛋饼煎得香脆，蛋香味非常浓郁，每一啖都系暖笠笠嘅幸福感，完全系蛋饼控嘅首选！小食方面，我叫咗佢哋嘅招牌花雕醉鸡，系用鸡卷嘅形式呈现，鸡肉嫩滑得嚟仲带有层次感。花雕汁嘅调味真系恰到好处，酒香浓郁但唔会太重，仲渗透住杞子嘅自然香味，非常开胃，令人忍唔住追加。最后饮品方面，当然唔可以错过佢哋嘅旺来绿茶。台湾凤梨嘅果香浓郁自然，已经带有淡淡甜味，配埋清新的绿茶，口感平衡得嚟特别解渴。我叫咗走甜少冰，仲系大大杯，饮完真系满足感爆灯。