樓下火鍋飯店

营业中

休息中

今日去开铜锣湾、湾仔，听闻楼下火锅饭店啲嘢几好食，所以特登嚟试下打边炉，我哋叫咗胡椒猪肚鸡汤做汤底，个汤好鲜甜，入面啲猪肚又多，同埋啲鸡都好滑，个汤底冇叫错。我哋另外叫咗大嘅手切本地肥牛、墨鱼丸、牛脷托、桂花蚌、脆鲩鱼片，同埋红薯粉，仲有紫菜炸响铃。个紫菜炸响铃真系好味，放落个汤底度焯大概三至五秒食最啱，中间个紫菜可能吸咗啲鸡汤嘅味特别鲜甜，大嘅手切肥牛就好有牛味而且卖相亦都好精致，牛利托我觉得系必食之选，钟意食牛嘅朋友一定要叫，而脆鲩鱼片亦值得推介，每片都切得大细一样，而且冇骨，最紧要就系够新鲜，桂花蚌同埋墨鱼丸亦食得出好有海鲜嘅鲜味，而且份量都畀得好足，食到我都饱晒，最后嘅红薯粉入面有成五至六碗，亦都系十分抵食，摆落汤底度浸大概三分钟其实已经食得。又系好满足好饱嘅一夜，下次同朋友聚会食饭我会再嚟楼下火锅，因为最紧要佢哋地方够大，同埋枱同枱之间亦都好有空间，唔会有压迫感。