中央飯店

营业中

休息中

一入门口就知道呢间系经营超多年嘅老店，装修伙计味道都好怀旧，正合心意。五个人四𩠌一汤，包括盐焗鸡半只、炸大肠拼腰肝卷、枝竹炆斑头腩、梅菜扣肉及胡椒猪肚汤，另外叫咗一碗白饭两罐汽水先至系$678，真系价廉物美。盐焗鸡半只都算大份，鸡肉够香够嫩。梅菜扣肉我话就话邪恶，不过呢间舖头嘅扣肉偏瘦，虽然都系脂肪同瘦肉一层一层咁隔开，不过脂肪比例明显低，食得健康啲都系好嘅。腰肝卷系几样之中最好食，猪腰猪肝同蔬菜切丝然后包住炸，味道同口感都唔错，点少少醋就冇咁油腻。炸大肠都唔错，揸得够干身，可以做双拼都真系好开心，因为可以食多啲款式。枝竹斑头腩个份量都几大，斑头腩肉都算多，记得喺出面其他地方食过，都差唔多嘅价钱但系份量就少好多。啲支竹吸咗斑头腩嘅鱼汁特别好味。个胡椒猪肚汤又系一绝，胡椒味刚刚好唔会太抢喉，猪肚洗得干净冇猪膻味，个汤煲得好靓，系超值选择。呢碗绿豆沙虽然系送嘅，不过一D都唔失礼。