紫荊閣海鮮酒家 (已結業)

以前工作地点附近就系呢间出晒名食怀旧菜嘅酒家，今日终于可以亲身嚟试一吓！八点几，好容易就有位，部长都好殷勤招待，不想等得太久先有得食，我哋即刻坐低就叫咗： 鸭掌包：以为一定要叫四只，但系阿部长话其实都可以叫两只嘅，为咗可以食多啲嘢，我哋梗系叫两只啦！鹅肠包住鸭掌、叉烧同鸡膶，原本以为会好硬，但竟然有惊喜！鹅肠有啲脆，鸭掌系硬身少少都还可以接受，最好系啲叉烧，软而多肉汁，衬埋鸡膶绵绵嘅口感，好正！ 富贵龙凤球：真系好富贵，成百蚊，入面系虾仲有鸡膶，有层炸粉包住先炸，外面铺满沙律酱，上面仲有啲芝麻。不过我哋觉得层炸粉怪怪咁，有啲似咸水角层皮，接受唔到！ 百花酿蟹钳：都算大只，系我哋食过嘅炸蟹钳中入面最多蟹肉嘅一间，（当然除咗旺角凤城）肉有啲散，但系味道就真系好有虾蟹味嘞！ 八宝鸭：要咗半只，其实两个人真系食唔晒，但系都想叫，因为想试！八宝鸭系最后先上嘅，卖相好靓，扒开只鸭，入而有好多料，有莲子、蛋黄、薏米、仲有啲唔知系乜，但系就好好味，啲汁亦够浓味，鸭肉入口即化! 汽水2罐哗！好饱！最后只八宝鸭都系食唔晒打包番屋企宵夜再战！