瑞士咖啡室

营业中

休息中

甫进餐厅就被时光倒流30年嘅氛围吸引住——格仔砖地板、高楼底配上80年代嘅吊扇、手写餐牌、瓷砖墙，一事一物都有怀旧嘅感觉。当中最重要嘅当然系一班经验老到嘅伙计们啦！佢哋最明白客仔喺中环食晏最紧要快，虽然全场咁多人令伙计好忙碌，我哋依然点完餐唔洗三分钟就上哂所有食物同饮品，手脚快、狠、准，真系值得嘉许。我叫咗咸蛋蒸肉饼饭同热柠水，肉饼同饭份量很大，相信系男士们食都会满意嘅份量。调味适中冇过咸，系我饿到肚都扁埋嘅时候热辣辣上碟，真系唔使10分钟就食清光啦。同事食时菜牛肉饭饮热奶茶，牛肉全部大大块，口感系有嚼劲嘅，足料到啲𩠌直情铺到成座山咁高！而且系即叫即炒，好有镬气，卖相同味道都好唔错！热饮仲系用最爱嘅厚身瓦杯装，奶茶香滑茶味浓郁。我哋两个食完都大满足，充满力量继续工作啦。