八寶清湯腩

营业中

休息中

小弟见识少，呢间系我人生暂时食过最好食嘅清汤腩面。平日七点几去到唔洗排队直入，啲枱唔算好迫，都坐得几舒服。坐低嗌左个清汤萝卜牛腩面$63，另外仲有崩沙腩，坑腩等唔同腩位选择。同朋友吹左几句水，等左两，三分钟就有野食。先讲汤底，本身唔知佢系药饍汤底，一入口好清甜，带少少当归味，惊喜地好饮。牛腩煮到好淋好软同时又唔会散，而且有好多片唔孤寒，不过同行友人话略嫌无牛味。萝卜无渣又入味。成碗面份量足够，正常成年人唔会唔够食。不过侍应哥哥态度有少少差，餐牌餐具就咁放（掉）落枱面唔讲嘢就走左去，我觉得可以温柔少少。今时今日香港$63食碗面已经唔算好贵，唔洗餐餐洗几百几千蚊食好嘢，简简单单一餐呢个价钱食到呢个质素真系已经好满足。