Panash (已結業)

原本想去o既食店去唔到，所以响海港城里揾食。估唔到是日大乡里出城，唔知道 Panash 除咗卖面包之外，原来仲开咗餐厅，唔通好揾o的？佢o既面包就食得多，见餐牌o既价钱都可接受，又想试下佢地o既食物水准，所以就决定帮衬。1点50分左右先坐定，午饭时间差唔多完，所以人唔多。同太太俩个人都叫咗午餐：鸡扒脆皮肠意粉、红酒烩牛尾饭。餐包先到，餐汤紧随其后。每人一片法包，一个小餐包。面包同平日买到o既相似，质地比较烟韧，加上热辣辣更好味。餐汤拣咗南瓜汤，一啲南瓜味都冇，味道都系麻麻地。鸡扒脆皮肠意粉：鸡扒大块亦够味，脆皮肠就只得半条，味道OK，意粉份量少，但煮得唔错，起码唔会煮得太腍。红酒烩牛尾饭：个卖相只系一般，但味道竟然唔错。而且牛尾炆得好入味之余，仲带有嚼劲。红酒汁够浓郁，送饭一流！餐饮要咗热咖啡同热柠檬茶。热咖啡比较苦涩而且冇咖啡香味！？反而杯热柠檬茶就几好味，清得嚟又够味。整体唔系差，只不过未够好到要再帮衬，都系继续买面包算喇！