樓下冰室 (已結業)

路德围多嘢食就系人都知，周街都系冰室就系人都见。朋友话尼间冰室出名番茄汤底同瑞士汁，今日行过，就入去试下啦！一坐低就叫左特色番茄浓汤米线配牛乳炒蛋再配招牌瑞士鸡髀。然后再叫个金牌咖哩牛腩饭。尼到冰室当然要饮冰啦，就叫埋忌廉红豆冰。食物好快就送到，好丰富呀！特色番茄浓汤果然名不虚传！番茄味浓郁得尼又唔会太覇道，唔会令其他食材都俾佢抢哂味。而且有粒粒茄肉，好足料！加$8加咗牛肉，牛肉肉质嫩滑，唔错。牛乳炒蛋亦都好好味，如果份量多啲就正喇！金牌咖哩牛腩饭嘅咖哩味香而不太辣，怕辣嘅人都食到。牛腩份量都几多，肉质同味道都系水准之上，配埋咖哩汁，送饭一流！尼到重点: 瑞士鸡髀！瑞士汁甜甜地，好惹味，令人食指大动！鸡髀肉质细嫩，而且好厚肉，好满足呀！唔单只食炸鸡要食鸡皮，食尼只瑞士鸡髀更加要食哂啲鸡皮，因为沾满哂好味嘅瑞士汁呀！忌廉红豆冰就不过不失啦。抵赞嘅系红豆粒粒分明，而且唔会过甜。不过红豆冰嘅奶就唔够多同唔够滑喇，扣左少少分。