Mr. Korea Chicken (已結業)

虽然星星热潮稍为冷却，但韩式炸鸡店仲有唔少。一直冇机会试吓，今日终于拣咗呢间，贪佢位置方便，又话自己系韩国过江龙。 一上去就发觉同本地餐厅好唔同。除咗唔少净系识韩文同英文嘅女侍应，k-pop 不停播，同埋枱櫈摆法好街边feel (虽然佢位置仲高过隔离旧楼)外，最大特色系... 开窗! 到客人渐多先关窗开冷气，本地食肆一定唔会咁做啰，因为大家都好清楚知道喺石屎森林嘅香港咁做嘅后果: 窗口位铺晒尘，唔坐窗口位又焗… 大概韩国人生活习惯真系唔同，谂住叫沙律汽水(本人唔饮酒，所以今餐唔系正宗大杯酒大块肉，哈)跟炸鸡食感觉冇咁热气，点知两样都唔冻嘅! 粟米沙律里面仲有大量洋葱，未食入口斋闻都好大阵味… 主角出场，大盘炸鸡有原味有辣味。但原味都有少辣，辣味其实又唔太辣。原味嘅微辣同香料味唔太突出，辣味酸酸辣辣几惹味，但其实味道同水牛鸡翼差唔多。食落，感觉其实KFC都唔太差，起码偶有佳作又可以散叫… 始终，觉得正宗韩食真系唔系我杯茶…