炊豕店 (曉悅) (已結業)

最近有个朋友转咗工，而家喺荔枝角返工，于是今日就攀山涉水过咗去荔枝角揾佢食饭倾吓偈，大家对𠮶头都唔太熟悉，误打误撞就入咗去呢间炊豕店。入面嘅座位相对地算宽敞，装修亦不花巧，墙上面就标明呢度系主打食猪嘅菜式。主打都系食猪扒，定位清晰，好适合呢区返工嘅上班族嚟帮衬。点餐纸上见到有一款叫大阪烧猪扒饭，一于就拣呢款。猪扒上充满大阪烧酱汁同埋木鱼丝，充满大阪风味，另外加$10加配厚切午餐肉。呢度嘅猪扒果然名不虚传，猪扒属于厚身猪扒，表面炸得外脆而肉质内软，而且都好大件，真系足以𩠌晒成碗白饭。而加配嘅厚切午餐肉亦绝不欺场，目测超过1cm厚，而且系属于中上质素嘅午餐肉，所以都值得加配。虽然呢度主打猪扒，但都想试埋其他嘢，所以令一份餐就拣咗要猪软骨，谂住猪软骨有汁，所以就拣咗配粗面，果然呢个配搭真系冇得输，而且仲有莲藕、萝卜、蔬菜等配菜，非常丰富！习惯点都叫返个小食，就清清地拣个肉燥冻豆腐，上面同样地加咗大量木鱼丝，配合肉燥酱汁，食起上嚟就唔会太寡。埋单时发现有九折，原来依家系新张期间，堂食全单有九折，优惠唔知几时完，要趁未完嘅时候再嚟过。