星期二薄餅皇 (已結業)

呢间pizza店，咁多年黎都系平靓正！一讲话想食pizza, 会谂黎呢度食，会多过帮衬某连锁pizza餐厅。呢次黎到有少少失望，店员妹妹啲态度同面口真系唔要得，全程冷淡无笑容，不过紧要嘅，都系黎食好野姐，叫左个二人世界餐，有个八吋pizza, 一个饭，一个意粉，两罐野饮。今晚两个人都麻麻地肚饿，叫左个巴西八吋pizza, 有肉碎，青椒，洋葱，配茄汁，虽然啲料好简单，但食落就觉得好有诚意，超多肉碎，而且粒粒都大大粒，料好多，饼边同饼底又够爽，食落好香又有咬口，八吋两个人食真系差唔多喇。意粉拣左茄汁司华力肠意粉，其实我系想嗌辣肉肠意粉，不过都好好食，茄汁够多可以捞晒成个意粉，喺出面食最惊汁唔够搞到成个意粉好干又无味，次次黎呢度食都无呢个担心，因为知佢一定足料！由于我地唔太饿，将原本个饭转左鸡翼，要加$5，呢次真系叫错野喇，叫左香辣鸡翼，我唔记得左影相，但呢个香辣鸡翼真系几搞笑，系原味焗鸡翼上面吱左一大堆辣椒酱上去，咁样就系香辣鸡翼@@系一大堆！食落仲出事，呢只辣椒酱系平时食干炒牛河落果只....讲真真系唔多夹，原味好食好多，以后一定要叫返原味！