Brass Spoon (已易手)

公司将要搬离湾仔了，如果要我数我会最挂住嘅餐厅，一定系呢间Brass Spoon。 本来我对喺香港食嘅越南Pho 系零兴趣，因为未试过喺香港食过好食嘅Pho，完全同越南食过嘅完全唔同。香港食嘅，好多时葱味太重，汤底又太酸，变相汤太浓，食唔到河粉嘅精髓。呢度嘅Pho 先讲讲个汤低，千其唔好因为汤嘅色水以为卖清，其实系足料淆制，浓度刚好，饮一啖先食，完全系为Pho打起完美嘅序幕。然后将香草叶同芽菜轻轻整碎再加落啲汤度，香味挥发，闻到都流口水。啲河粉又薄又滑，一吸就吞咗，无夸张！最后亦都系重点，Pho 嘅牛肉同牛丸。我拣嘅系生牛肉，另外加牛丸。生牛肉好嫩，又有牛味，然后又唔肥，唔似得一啲雪花牛得肥膏有味，牛无味。仲有系啲牛丸，切左一半都无影响到佢弹牙嘅口感！又因为佢切咗一半，所以啲汤味深入咗啲牛丸入面，每一口又透番啲牛肉味出黎。所谓嘅弹牙，正正就系呢个效果。呀，仲有呢度落单其实系好似啲日本拉面店咁，你可以选择香葱等份量，可以夹番你想要嘅口味。