大師兄 (已結業)

好钟意食点心，但系唔系好钟意去茶楼，所以差不多每逢周末我都会去食大师兄。不过最近由于疫情，佢净系改咗做外卖，冇堂食所以我都少食咗。点心质素系唔错嘅，不过就一时时，有时人多都会炒车，所以最好少人啲嘅时候先食。例如我试过潮州粉果系夹唔起，一夹就成旧烂咗，一pat野咁好恐怖。环境来讲就系好挤迫嘅小店，服务都唔好要求有啲咩，基本上就系家庭式营运，不过呢啲来讲我都唔系好执着，最紧要系食物。虾饺王和烧卖王两件装各$18，两个人食啱啱好，推荐！肠粉都滑嘅，只只都唔错，个人比较钟意食叉烧肠同埋虾肠。滋润红枣糕$16三件，香甜软糯。咸水角外脆内软烟烟韧韧，$18三件。蒜蓉虾春卷$20三条，新鲜出炉非常香脆，入边只虾仲要好大只。马拉糕$16，呢一款就一时时，有时好好食有时唔好食。避风塘炒萝卜糕，少少辣，脆，好惹味！茶剩系得两款，我通常都系饮普洱，佢啲茶唔好饮，叫做好过饮水。整体来讲食得过，性价比极高！平视我两个人食大概点六至七款点心，埋单$120-130。