渾喆 (已結業)

而家嘅手摇饮品铺头越出越多，净系旺角都唔知有几多间啊。个人来讲唔系好钟意饮珍珠奶茶嘅，一嚟觉得太甜，二来越来越多新闻话珍珠可能唔系好健康，今日行街经过登打士街，见到呢一间手摇饮品，好似几refreshing㖞，所以就买咗一杯嚟饮啦。望落个Menu其实同平时啲手摇饮品铺头差唔多，有奶盖系列，有珍珠系列，亦都有水果茶，吸引到我眼球嘅系呢一杯"菠萝王子"。鲜菠萝加茉莉花茶，感觉都几新鲜㖞，叫咗店员帮我整一杯少甜嘅，上面有黄色一点点，好似云咁样，好梦幻！仲有我觉得佢个杯嘅设计都好特别，同平时嘅饮品上面𠮶块胶片唔同，系可以就咁开即刻饮嘅，唔使用饮筒架！唔会好似平时啲奶盖或者黑糖珍珠奶茶咁样，饮完个口会觉得唔知点咁，成日想饮水......。饮落淡淡嘅菠萝肉，一丝丝咁好得意呀，而且茶底都算清，我谂可能系有啲菠萝汁加埋茉莉花茶，甜甜地又有少少茶味，都几清新，夏日炎炎饮翻杯鲜果茶，正！下次试埋佢哋个芋圆系列先。