大街市集

营业中

休息中

入夜到差唔多睇烟花时间，闻到大街市集有好香嘅窝夫饼味，本来想买个窝夫食嘅。但排队𠮶阵见到有圣诞特色冬甩，仲要系我钟意食嘅日式波提冬甩，就决定改食临近圣诞先有嘅特色冬甩。冬甩有黑色同粉红色，我就要咗粉红色。上面有圣诞造型嘅小朱古力同糖装饰。设计吸引💕之于味道就……我都未食过咁硬又冇味嘅波提冬甩😅我估佢可能已经雪咗好耐。波提冬甩加咗糯米粉，口感应比一般冬甩软糯，但呢个比我喺出面一般面包舖食到嘅普通冬甩仲要硬。我要用力先咬到一啖，上面啲圣诞装饰已跌哂落嚟。大街市集买完食物，后面有啲露天cafe位可以坐。如果不计食物质素，环境系好唔错嘅。特别系夜晚同宜家呢啲临近圣诞节时间。坐位系露天花园式设计，配合卖相唔错嘅甜品打卡一流。除咗预先雪住嘅甜品外，仲有卖热盘同新鲜做嘅窝夫，相信味道应该会好啲。