canton pot (已結業)

我除咗系蒜魔之外，亦都系菇魔，任何菇都好钟意食。香港好似冇乜边度打边炉够佢呢度咁企理，唔似一般港式火锅店咁嘈咁迫。装修走现代风格，不过骨子里依然传统，主打各式高级汤底、海鲜及其他特色食材例如手工饺子，仲要有好多不同嘅菇类做配料，令我爱不释手。虽然嚟过呢度好多次，不过每次都冇打过食评，就今晚食完打返篇啦混酱 （每位＄25）每张台都有一盆混酱，任你由头混到尾。有12款任君选择，葱花、蒜蓉、豆瓣酱、胡麻酱、炸蒜、洋葱粒、指天椒、腐乳、南乳、花生酱、潮州辣椒酱、沙嗲酱。钟意辣嘅又开心，唔食辣嘅又快乐，＄25有咁多选择，好！松露百灵菇野菌汤 （原价＄98）凳都未坐暖，店员已经问 "系咪松露百灵菇野菌汤啊？"的确系，嚟咁多次都系要呢个汤底，一来我赢咗个比赛，奖品系一年有365个免费汤底，二嚟系呢个汤底真系好味到不得了。店员亦都好体贴咁放低只小杯，等啲汤滚起之后饮嘅。汤味道清甜，每口都散发住松露及野菌嘅鲜味。另一样我最欣赏嘅系，佢嘅汤锅全部系分两边（就算叫一款汤底都系），通常打完牛肉都会有一层油，咁就唔方便我呢啲钟意一路打一路饮汤嘅朋友啦。但嚟到呢度，我可以一边打非肉类，一边打肉类，咁就唔会怕油啦！