彩福國宴 (已結業)

好耐冇去酒楼食晚饭，听朋友讲彩福晚饭有d特价野食都几抵，所以今晚见得闲，就同屋企人去食下。我地叫咗3个𩠌+2个甜品。柚子爽荞头京烧豚肉粒 - 呢一个组合好有新鲜感。柚子酱汁绝对系豚肉嘅解腻良朋，我估呢个𩠌嘅做法类似咕噜肉，不过转做柚子味，每粒豚肉都被柚子酱汁包住，肥膏少，肉汁亦都锁得好好，正呀! 食几件肉之后，食件荞头，咸咸酸酸咁，刺激味蕾，好似赶走咗口入面嘅柚子甜味，感觉几得意。脆皮南乳鸡半只 - 好油水的鸡，不过皮脆肉嫩，沾南乳酱一齐食，非常美味! 其实半只鸡嘅分量都唔少，但我地好快清晒。上汤焗加拿大龙虾伊面 - 我见隔离台有一对公公婆婆都有叫呢个，几好咁，所以跟风。确系爆抵食之选! 龙虾好肉地又弹牙，$138咁抵，去边度揾? 仲要有伊面底! 香芋西米焗布甸 - 西米焗布甸系面，软滑嘅芋蓉系底。卖相靓靓，送嚟嘅时候有少少微温，甜度适中，呢个系出乎意料嘅好食，$16都抵wor。杨枝甘露 - 我试咗一啖，觉得呢个比焗布甸甜，但我家嘅杨枝甘露控话啱佢口味。呢餐埋单约$400﹐抵食又好食，下次会再嚟。