古早牛肉麵 (已結業)

次次经过深水埗，见到呢间台湾嘢都觉得装修得好复古，想揾个机会去试吓，今日陪另一半出深水埗睇电脑，终于去试。环境 装修设计有花过心思，内部设计到好似喺台湾夜市嘅餐厅咁，几有特色。餐牌 价钱十分相宜，食物最平20几蚊就有交易，牛肉面$60都唔使。招牌红烧牛肉汤面 $59 有牛腱、萝卜，都几足料，牛腱有4,5件，面质几弹牙，汤头正常，$59来讲都算抵食。古法卤水大鸡腿干拌面 $55 可以拣肉燥或麻辣酱，身为嗜辣者硬系拣后者 。鸡脾好大只！卤水汁都腌到入肉，唔会有雪藏味，捞匀麻辣酱干拌面好正，辣辣地带点麻味好香胃。起司蛋手抓卷饼 $36 价钱相宜，馅料加咗好多沙律菜，外层煎得脆香，内里再加多d芝士就更好。肉燥烫青菜 $28 出街食饭会食少咗菜，所以叫返碟菜食下~轻芝士奶盖岩盐乌龙茶 $23 叫得轻芝士奶盖，就无平时饮嘅奶盖咁咸，味道轻淡，配乌龙茶就清清地。总括然而，抵食嘅台湾菜，果然深水埗区又多嘢食，而且好多间食物都好平。