樓下冰室 (已結業)

今日约左朋友食饭，佢家阵响荃湾做嘢，佢话附近有间冰室d嘢食抵食夹大件，所以就带左我去。呢度都几大，响横梁上面仲见到d怀旧摆设。座位差唔多全部都系卡位，座位宽阔，坐得舒服仲好干净添。餐牌有好多嘢食，见到个样好吸引，样样都想食。今晚由朋友发办，叫左一个饭，一个小食，一只鸡肶，另外两杯特色饮品。焗鲜茄猪扒饭先到，比餐牌张相更加多。猪扒够厚实，好有咬感，饭底嘅鸡蛋比例都几多，饭唔硬，茄汁味浓，味道酸咪咪，都几开胃。小食系焗芝士肉酱薯角，呢个小食份量多，够晒大碟。肉酱味道香浓，芝士份量正常，唔会过份地多，食到好漏。薯角比较粗身，薯仔味浓，焗得香脆。瑞士鸡肶比出面食开嘅大只，闻到好香，入口味道甜甜地，肉厚得黎都唔算鞋，都整得唔错。呢度啲饮品都几特别，喺外面都未见过，好多都好想饮。朋友就拣咗华田脆脆，佢话甜味十足，加埋上面d朱古力脆脆，有口感之余啱晒佢口味，正。我就叫左杯红豆奶茶，因为出面都未听过，觉得好特别。我无谂过原来奶茶加红豆系咁夹，红豆起晒沙，加埋奶茶又唔会太甜，将单调嘅奶茶变得有层次，真系好好饮。