營豐海南雞專門店 (已結業)

想搵到好嘢食，梗係要周圍去啦，今次嚟到鰂魚涌搵食，去咗一個之前未去過嘅商場，商場入邊唔算多餐廳，但最得意嘅係商場外面竟然有一間海南雞專門店。我對小店都有點私心，見到呢啲咁隱蔽嘅小店都好想去試吓，雖然佢係一間外賣店，但係見到個價錢牌，真係唔好諗咁多快啲去試吓先。今日得一個人食嘢，所以揀外賣都幾好，揀咗一個招牌脫骨海南雞飯$45，同埋鹽香煎雞翼$20/5隻，雞翼普遍都幾大隻，呢個價錢十分之抵。特別欣賞嘅係海南雞飯，一打開蓋，已經聞到香噴噴嘅雞油飯未，我本人覺得，食海南雞飯一定係冇骨最過癮，所以果$5係值得比嘅，雖然就咁食飯已經好好味，但係老細應該覺得香港人食雞飯應該要有薑蔥油，撈飯食確係更加正。另外要一讚嘅係海南雞飯份量好多，如果一個普通食量既女仔應該會勁飽，所以男士們揀黎呢到開飯就最啱啦，同埋貼心嘅老闆放低下邊放咗啲酸蘿蔔，食完少少油膩嘅飯之後食返塊酸蘿蔔感覺清新好多。