圓老爺雞煲小廚 (已結業)

今日喺元朗呢边做野，放工约埋朋友食饭，佢就带左我黎呢度。呢度配搭几特别，有剩鸡煲食，唔系食完打边炉o个种，唔使担心热气，另外有唔同种类嘅小菜。鸡煲可以拣酱皇鲜味或者麻辣重庆，半只或一只。我地叫左酱皇鲜味鸡煲(半只)，唔食得太辣又心思思想试下辣，店员好细心咁俾埋个秘制辣酱我地。鸡煲连埋gas炉一齐上，咁上下时间店员就过黎将所有材料炒炒炒，一熟就可以开盖食。时间控制得好，鸡件非常香滑，惹味之余唔会劲重味精，洋葱好甜，加埋红葱同莞茜令成个鸡煲味道升华，辣酱味道都好丰富，少少咁点下几岩我地，但加埋一齐相信我会觉得太辣。椒盐鲜鱿份量几多，鱿鱼一d都唔鞋，炸粉唔会太厚，香浓椒盐味点埋个酸汁真系一旧又一旧食唔停。金银蛋苋菜汤底清甜，口感岩岩好唔会过淋。价钱实惠，7点开始坐无虚席。题外话，老板圆老爷同招牌上面嘅卡通圆老爷几似样㖞，哈哈。