Pizza Piazza (裝修中)

虽然知荔枝角工厦都有唔少美食，不过喺懒得揾嘅情况咁啱见到大马路侧边有间西式餐厅，而且餐牌都有唔少选择，吸引左我帮衬。估唔到嘅系假日嚟到都仲有lunch set提供，饭意粉同pizza都有，而且觉得西餐嚟讲价钱都唔算贵，包埋餐汤大概$7-80。部分餐点可能要再额外加钱，今次我拣左个食意粉-意大利烟肉条Mancini超粗意粉($78)。餐汤系洋葱汤，味道正常而且食到一丝丝嘅洋葱。主菜意粉嚟到嘅时候闻到芝士嘅味道好香，隔离仲附有面包条，成个意粉睇落观感唔错。佢嘅烟肉系粗条形，加上意粉有返咁上下粗度，食落口感十足，个人几中意依个texture。而有啲出乎意料嘅系佢番茄酱属于偏酸，食落觉得几fresh同埋酸酸地又几开胃，同平时食开𠮶啲唔太一样，但觉得都几好食。另外值得一赞嘅系佢啲蒜蓉面包条，食落蒜香味十足，会令人食上瘾，如果有多啲人一齐食嘅话应该会直头加钱叫依款小食。饮品方面拣左伯爵茶，估唔到系成壶上，可以自己慢慢倒，而且分量唔少仲可以倒到2-3杯。整体嚟讲，觉得几抵食而且食物质素都好好，下次有机会都想一班人嚟试埋佢个pizza。