十三少 (已結業)

宜家天气冻冻地，好啱食辣嘢。十三少一向有帮衬开，想食辣嘢咁就拣佢啦。一坐低，即刻送上一碗炸黄豆，黄豆炸得好酥脆，一粒接一粒嘅食到停唔落口。前菜拣咗凉拌土豆丝，土豆丝切得大小好均匀，食落好爽脆，酱汁酸酸辣辣好开胃，两啖已经食哂，作为开胃前菜黎讲啱啱好。干煸四季豆，哩碟炒得好有水准，四季豆炒到好干身，食落好脆口同埋够晒镬气，会有少少辣味，不过唔会太辣，成碟够晒惹味。水煮鱼好大一份，配料好丰富，有鱼肉，豆芽，青瓜同埋宽粉。鱼肉拣咗鲈鱼来制作，好幼滑同埋无骨。鱼汤系用鱼骨煲制，成份鱼虽然系麻辣味，但都饮得出汤嘅鲜甜味。配料份量都几多下，宽粉差唔多装咗两小碗，青瓜同宽粉嗦哂汤汁麻辣味道，食落有少少麻辣劲好味，好似食咁酸辣粉，赚咗TIM。水煮鱼睇落好似好辣咁，食落唔会觉得好辣，对于我黎讲都系小麻小辣。成份鱼肉食完，再食完配菜，劲饱。虽然唔算辣，食完都出哂汗，唔得返内地食水煮鱼，十三少啲水煮鱼又真系唔错！