逸東軒

营业中

休息中

上月《香港澳门米芝莲指南2024》名单出炉，当中不乏五星级酒店高价位餐厅，想经济一啲品尝荣获米芝莲殊荣嘅餐厅，逸东轩确实系不二之选。逸东轩位于逸东酒店B2，由地面行两层较狭窄嘅楼梯，感觉隐蔽。餐厅装横古色古香，枱与枱之间非常阔落，同一般中菜厅狭窄拥挤嘅布局大相迳庭，环境舒适惬意，好适合同亲戚朋友茶聚。点心款式同普通茶楼大同小异，不过逸东轩嘅点心食材比较新派，菜名都冇咁刻板。今次我哋两个人一共点咗5碟点心同甜品。第一碟点心系香麻叉烧酥。呢碟看似普通，但我哋两人一致认为系五碟之中最好食。叉烧酥外皮酥脆可口，叉烧肉质鲜嫩多汁，蜜汁酱香味四溢，口感有嚼劲，系必点之选。平时食烧卖都系食鱼肉烧卖多，今次就点咗笼带子蒸烧卖。原粒带子配烧卖冇违和感，带子望落好有光泽，食落新鲜又爽口。之后仲点咗春风得意肠粉，出面层肠粉皮包住中间块春卷皮再包住虾肉，有层次口感。肠粉仲可以配搭甜酱同芝麻酱，如果虾肉馅多啲丰富啲会更好。淡绿色嘅斑兰流沙包外皮好柔软，虽然斑兰味唔算太出众，但个个包都做到流心奶黄效果，流沙内馅亦算口感顺滑，整体不过不失。最后以香芒糯米卷作结。芒果好鲜甜，芒果糖糯米嘅比例系9:1，食完唔会觉得滞。