小曼谷泰國美食 (南角道)

营业中

休息中

好多年前已經食過小曼谷，佢都算係九龍城嘅經典之一，今日再嚟到呢度，估唔到個水準都仲keep到，同埋好驚喜，今日星期一特價有$38嘅冬陰功魚片湯，非常抵食。見到唔同日子都有唔同嘢做特價，平日夜晚嚟都係一個幾好嘅選擇。食泰國菜我一定會食沙律，今次就試吓佢個青木瓜沙律，個調味做得好好唔會太酸，而且亦都好體貼可以走辣，鍾意佢配好多花生粒粒，係清新嘅口味選擇。另外叫咗半隻燒雞，因為係泰式燒雞，唔好諗住係港式嗰種軟腍腍口感，反而佢係香口啲、肉身實淨啲嘅口感，口味係有少少焦香，好惹味！小曼谷當然要食佢嘅炒粉麵飯，今日試辣豬肉碎炒飯，調味適中，而且有好多豆角，個金不換嘅味都好突出，炒飯嚟講一啲都唔油，食完唔會覺得好滯，大大碟都唔使$100 ，好抵食！小曼谷屹立咗九龍城咁多年，佢個水準都仲keep到，而且價錢其實都唔係加咗好多，非常公道，份量亦都唔少，如果啲晚餐嘅餸啱你口味，其實$288已經有一個二人晚餐，仲送埋甜品，性價比好高！所以星期一晚都座無虛席，其實都真係有原因。