燒肉酒場 (已結業)

虽然系大热天时，但都心思思想食下烧肉，于是就帮衬搬咗舖嘅烧肉酒场，而家个位置响登龙街永光中心。一坐低就嚟个柠檬烧酎，食烧肉又点可以唔饮酒呢。开始食肉之前先食过椰菜丝沙律，因为食烧肉都算热气，通常日本人都会食椰菜中和返啲热气。接着上枱嘅就有蒙古羊肉卷，肥瘦相间适中，羊味丰富。再嚟纽西兰羊西冷，上枱时睇见肉嘅颜色已经觉得十分吸引，但系唔可以烧到太熟，如果唔系就会有啲韧，肉味比之前羊卷肉丰富。香葱烧牛舌，虽然牛舌系薄烧，但都唔觉得韧，每边烧十零秒就食得，加上炒过嘅葱同炸蒜，惹味提升。跟住嚟壶渍牛肋条，牛肋条烧到一半要将佢剪开，咁个心就容易啲熟。因为牛肋条有啲带筋嘅位置，所以都几有咬口，要花啲时间慢慢咬，肉味香浓多肉汁。接着嘅系伊比利亚梅头肉，梅头肉肥瘦相间适中，烧完之后有猪嘅油分香味，呢个好好食👍最后烧返个柚子鸡腿肉，肉先用柚子腌过，烧完之后有淡淡的柚子香，因为全部都系鸡髀肉，所以好嫩滑。最后为咗饱肚加咗个羊汤乌冬，羊汤味唔算太骚，而乌冬就烟韧有咬口，两个人share食份量啱啱好。铜锣湾来讲人均消费四百零蚊，食到咁多唔同嘅肉，感觉好满足，肯定会再帮衬👍