燒味滷師 (富榮花園) (已結業)

最近经常做无饭煮妇，日日放工都要谂买咩食，饭盒食得多食到嘴都歪，先生都开始投诉，今日决定食好少少，买佢最爱嘅烧鹅塞住佢把口。呢间烧味店非常抵食，特别系烧味饭，烧鹅双拼都只系三十蚊，平靓正！泰式凤爪份量好多，已经去咗骨，酸甜得嚟带点微辣，非常开胃。下庄即系烧鹅髀，睇见卖相已经流晒口水，烧鹅肥瘦适中，一咬落去油香四溢，绝对系人间美味！店员仲好贴心，另外包好一小袋烧鹅汁，怕我倒泻，用嚟捞饭一流！叉烧半肥瘦非常靓仔，入口松软唔会干争争，而且咸淡适中，绝对系白饭杀手。盐焗大鸡非常肥美肉厚，皮肉之间仲有少少啫喱，入口嫩滑带咸香。呢度嘅外卖烧味整体质素唔错，最紧要系价钱非常亲民，煲个饭烚个菜又一餐，简单方便。