水門雞飯 (百宜樓) (已結業)

呢间系千色对面街既鸡饭黎得梗系食招牌菜，所以叫咗个水门双拼鸡饭， 有炸鸡同埋海南鸡，海南鸡好滑嫩，非常入味，唔点酱汁都好够味， 亮点系佢系冇骨海南鸡，啖啖肉都几正，加十蚊可以转鸡髀肉应该再正好多，下次要试下。 第一次食炸嘅海南鸡，炸鸡一啲都唔干， 亮点系佢个酱汁酸酸甜甜几得意! 配埋个油饭真系一绝! 50蚊松啲仲有埋个汤， 自己就觉得几抵食!另外叫多咗个泰式炒通菜同芒果糯米饭做甜品， 炒通菜中规中矩， 正常泰式炒菜咁， 但胜在份量好足; 芒果糯米饭以为佢细细份， 但都几足料， 芒果超级甜，糯米饭唔会好硬， 椰汁味唔太甜我钟意。最后值得推介佢啲嘢饮， 叫咗个最正路嘅泰式奶茶， 茶味好香，完全同泰国嘅味一样， 重点系唔会太甜。呢间嘢选择都几多，多数见啲海南鸡饭舖都净系做死海南鸡， 最多就做埋猪手饭， 呢度又有沙律又有菜又有鱼又有粉面，仲要有甜品， 绝对具备回头店嘅特质， 下次要嚟试下佢啲其他嘢食睇下系咪同招牌菜一样咁得!