御名園 (已結業)

今日去揾将军澳朋友，佢介绍左天晋汇的御名园，主打食中菜海鲜，价钱公道，又唔会好迫好嘈，味道仲要非常好，果然冇介绍错。我哋叫咗两个小菜、一条老虎斑、一个炒米粉，样样都有海鲜配料，食得咁丰富都只系六百零蚊，真系好抵食啰！餐厅其实做紧优惠，见到有好多海鲜小菜都做紧特价，下次要再嚟食过试吓其他菜先得。蜂蜜柚子明虾球：呢个虾球真系整得好出色，每粒都大大粒，而且又爽口新鲜，外边系炸到脆卜卜，配埋蜂蜜柚子汁，就唔会太过热气，仲酸酸甜甜，零舍开胃。XO酱翡翠炒黄金海螺片：呢个海螺片由于用XO酱炒，味道故知然香浓入味，海螺片够爽口，再加埋云耳、翠玉瓜等配料炒埋一碟，真系好味道，送饭一流。蒸老虎斑：呢条老虎斑只系$168，有成斤重，好大条。老虎斑非常新鲜多肉，肉质够实够弹牙，口感好好。而且酒楼用嘅蒸鱼豉油都系好味，成条鱼非常入味，食得好过瘾。海鲜家乡炒鸳鸯米：鸳鸯米原来系米粉加粉丝，炒埋一齐，师傅嘅手势好好，炒得非常干身，有蛋丝芽菜等等，但系都唔会整到个米粉出水。配料另外有虾、鱿鱼，样样都好新鲜爽口弹牙。食完仲有蛋白杏仁茶送，真系好惊喜。总括嚟讲今晚餐饭我同老友都非常满意，下次会再嚟帮衬。