中村藤吉 (已結業)

香港人对抹茶既热爱程度日渐加强，过江龙开完一间又一间，今次小弟就试下日本老店中村藤吉。位于尖沙咀 The One 交通方便，车主们更是欢喜，因为食完通常都够做泊车优惠。18/F 高高在上有无敌景观，店内开扬又舒服，有机会下午坐低叹下望下景更是赏心乐事。晚上接近 6pm 开始等，约 40min 入座。小弟对腐皮有种说不出既喜爱，呢个腐皮乌冬一次满足我对腐皮加抹茶既欲望。腐皮两大块好甜，旁边配有大葱，令个汤味道多一分层次。清汤应该系木鱼煮成，清澈简单，饮完仲想饮，有停不了的感觉。乌冬同荞麦面似系同一个粉整出黎，面身比荞麦面粗少许而更有咬口，但抹茶味唔出，只有睇颜色觉得系同抹茶有关。配菜有牛蒡，健康又好食。芭菲外观满分，本来想试焙茶味，不过可惜已经卖晒。芭菲上面有个靓靓“十“字，一层层馅料整齐排列，有白肉丸子、红豆蓉、抹茶jelly、脆米、雪糕等等。一杯芭菲有晒禁多甜品系入面，最适合咩都想试既贪心朋友。今次试呢个芭菲溶得好快，要影相就要快手d。如果想细心食出每种甜品既味道，建议试番各自既特式甜品，大混杂会令到味道口感变得有d复杂。呢个汤好好饮，饮落去好幼滑，加上内里既红豆蓉，有种绵绵既质感。