新泰東南亞餐廳

营业中

休息中

放工同先生喺尖沙咀觅食，俾呢架色彩鲜艳嘅Tuk Tuk吸引住，一睇就知道系食泰国菜，门外亦有唔少人等位，似乎唔错。餐厅位于地牢，地方非常大，仲有几间包厢，而且座无虚席。食泰菜当然唔少得虾饼，先生提议嗌呢道烤蔗虾，好有新鲜感，用鲜蔗串住虾胶，香口弹牙不在话下，加上淡淡嘅蔗香，唔错。冬阴功亦有惊喜，味道香浓，酸辣度适中，材料亦算丰富，有大大只虾同唔少鲜菇，连平日对冬阴功要求极高嘅先生都大赞。马拉盏炒通菜加入虾米同肉碎，咸鲜惹味，通菜亦保留到爽脆嘅口感，水准颇高。金边粉炒得够香口，用蛋网包住，口感微微湿润，味道够哂地道，仲有大大只虾仁，如果配搭埋辣椒粉就更点睛。咖喱软壳蟹配上用牛油烘过嘅面包，系完美嘅配搭，而且份量非常多，三四个人食都唔系问题。软壳蟹炸得酥脆，入口仲有淡淡嘅蟹膏味，味道鲜甜；黄咖喱香浓细滑，而且椰奶味够重，配搭软壳蟹就最合适不过。除咗软壳蟹之外，面包亦系另一重点，面包质感软熟，搽上牛油之后烘至表面微脆，沾上咖喱一齐食，令人满足！而且咖喱份量好多，即使成件面包浸落去亦绝对足够，非常邪恶！今晚每道菜式都令人满意，味道够哂地道正宗，而且价钱合理，难怪市道唔好依然人气爆灯。