樓下冰室 (已結業)

系荃湾唔知想食咩，嚟路德围就实无死。哩到聚集左各式各样嘅餐厅同糖水店，行过想食咩就食咩。今日试下哩间新开嘅“楼下冰室”，装修系好似怀旧茶餐厅。以蕃茄为主打，好似蕃茄浓汤面、蕃茄焗意粉、蕃茄焗猪扒饭等。叫左个午餐同下午茶餐食。普通嘅午餐系跟脆猪同炒蛋，但为左一试瑞士汁鸡脾，所以食$46餐。蕃茄浓汤螺丝粉配牛乳炒蛋都几大碗，蕃茄汤就唔系浓汤，相反系清甜，味道几似主家味，有蕃茄粒。去茶餐厅食总系味精多，因此嚟一碗鲜茄面，感觉健康d。 招牌瑞士汁鸡脾果然系招牌。鸡脾肥大厚肉，肉质都算嫩滑，而且皮薄，无太多肥膏。瑞士汁味刚好，甜甜地，令人忍唔住一口又一口地咬。而且鸡脾腌得入味，唔洗点太多汁都够哂味。见在埸不少顾客都用手拎起食，果然食鸡脾都系用手先够滋味！可惜下午茶餐就相对失色，无蕃茄食物选择，而且计返个价钱无食常餐咁抵。 厚切牛乳炒蛋治好大份，哩份三文治应该至少用左三只蛋。不过炒蛋并唔香牛乳味，甚至连蛋味都欠奉，炒蛋又唔够滑，实在令人失望。 另外，餐茶可以拣自家制罗汉果茶，清下湿热肝火。虽然个蛋治唔得，但个蕃茄汤同瑞士汁鸡脾都可以一试。