囍雲天酒家 (已結業)

之前响观塘码头学完车，都会行下观塘海滨公园， 行完过对面的宏利金融中心见到囍云天都想试下，所以今日带家人来一齐饮茶。入到酒楼，先有一排卡位，适合四至五人，再行入里面好光猛，一个无敌大厅，再加埋门口的花圈拱门，格局好适合摆酒婚宴用。我地坐在近窗边位。先叫菜苗饺$34.8，已望到翠绿的菜苗，晶莹剔透的饺皮好薄，里面好多菜苗爽口，有少少虾同肉，够鲜甜。北菇棉花鸡$35.8，好大只冬菇，有三四大块的鱼肚，鱼肚好弹牙，靓鱼肚冇腥味，鸡肉够嫩滑。沙律虾春卷$34.8外皮好酥脆，里面有虾肉同杂果，少少沙律酱，好开胃。想食太极鸳鸯炒饭$148，上枱时好大碟，多料，好大只虾，蕃茄酸味开胃，肉丝好鲜甜，最正系个炒饭底，蛋包住每粒饭粒好香，食完停唔到口。甜品叫了擂沙汤丸$28.8，外皮烟韧，馅有流心的芝麻香，唔会太甜。另外都叫了碗糖水，罕见有蛋白杏仁茶$38，杏仁味浓，有细粒粒杏仁碎，是新鲜即磨的，够多蛋白好滑。埋单时见茶芥收$12位。临走时见到有张10:30 前下单的特价点心纸，下次都要早啲来饮先。