麵麵 (已結業)

今日嚟咗弥敦道726揾食，晚饭时间通常都排长龙等电梯，好彩今日去一楼揾食，可以行上一层楼梯就到达呢间面面。呢度有晚市套餐，亦有主餐牌可以选择。首先店员会给客人两小杯鱼汤，鱼汤呈现奶白色，饮落非常鲜甜，完全唔会觉得有腥味。极上鱼宴料理，听个名都觉得好丰富，有鱼皮菜肉饺子、墨鱼春卷、鱼肉春卷、鲜虾同鱼蛋，每款食材都美味可口，鱼汤鲜甜，鱼乌冬同平时食开嘅乌冬唔同，比较上爽口，但亦不失烟韧感觉。另外点咗脆烤鸡扒浓鱼汤鱼面，鸡扒好大块，香脆得来又唔油腻，鱼面比鱼乌冬较幼细，口感就更爽口，有啲似蒟蒻嘅口感。小食方面，睇餐牌见到有一道菜叫做「虾兵蟹将」，于是就点了一客，其实系类似炸虾饼，肉质弹牙，配合沙律酱同鱼籽一齐食都唔错。另外我哋点咗一份流心芝士墨鱼波，佢系用墨鱼滑包住芝士再炸，所以芝士有爆浆嘅效果。呢度转特饮一啲都唔贵，所以我哋就点咗薄荷朱古力咖啡同埋海盐焦糖咖啡，一冷一热，各有特色，两杯我都觉得推介。