春禧堂台灣料理餐廳 (已搬遷) 新店位置

呢间台湾餐厅原来啱啱开咗两个月左右，咁岩行过中港城，就入咗嚟试吓，间餐厅装修得几靓几有特色，座位宽敞。食台湾嘢就一定要叫牛肉面，推介呢度嘅红烧腱心牛肉面，牛肉面汤底好浓，一啲都唔油腻，几块牛肉煮得非常软林身，入口即溶，又有牛味。我最钟意食佢台湾面嘅面质，软硬适中， 好有口感，啲面索晒牛肉浓汤嘅精华。牛肉面卖相都十分精美，有萝卜、小棠菜作为伴菜，望到都觉得吸引。呢度除咗一般嘅粉面饭之外，仲有好多选择。冬天就最啱食暖粒粒嘅火锅，试咗佢嘅冬暖酸菜鱼锅，鱼片好新鲜，好滑而且又冇乜骨，酸菜汤底味道啱啱好，少少酸令到我更加开胃！除咗鱼片之外，个锅仲有好多唔同嘅配菜，有金菇、娃娃菜、鲍杏菇、豆腐等，清清地系健康之选，就算唔配饭面就咁食个锅都够饱，食完呢个锅真系成身暖晒。食台湾嘢就梗系必叫盐酥鸡扒做小食，鸡扒即叫即炸，上到枱仲热辣辣，鸡扒好厚身好大块，外皮炸到脆卜卜，但鸡肉仲保持到嫩滑juicy, 而且个款又唔算太厚，好滋味!台式餐厅就一定唔少得台式饮品，我就简单啲拣咗杯香浓台式奶茶，钟意佢可以自己拣甜度同冰度，茶底够浓，系正宗嘅台湾味道。