長發麵家 (已搬遷) 新店位置

小弟钟意食牛腩，但以往都系食清汤腩，又或者系咖喱牛腩。柱候牛腩？真系好少食呢。之前讲过要征服整条耀东街，是日去到最后一站的长发，目标好明确︰一碟牛腩捞。等紧既时候，留意到那个大到可以煮成只牛的大煲，那个装住整间舖头的心血的大煲。只见小二揭起煲盖不停咁搞啲牛腩，一阵白烟随即冒上，真系睇见都期待。牛腩捞话咁快就到。牛腩好深色，食落好入味，酱汁有好浓郁的香味又唔会过咸，好出色的柱候酱。牛筋好滑，但系冇咁肥个几旧牛腩就稍为韧左啲，而且欠缺左牛味，系美中不足的。面亦几爽口弹牙，好容易就用啲汁捞晒来食。附上既汤好惊喜地非常之清甜，唔系味精汤而系有好香的虾子味，又系好快就饮晒。好多人甘愿付上几百蚊去高级餐厅食，因为除左食物之外仲可以「食环境」。但其实大排档都好风味十足的，怀旧的摆设，朴素打扮的小二和客人，散发住传统味道的食物...而依种「环境」只需要几十蚊就买得到，只要换一换自己既心态，其实个种满足感都系一样的，甚至可能更大。