CHOO CHOO (已結業)

餐厅嘅环境十分特别，系模仿火车车卡嘅设计，墙上面仲有模拟坐紧火车时嘅风景添，仲识得郁架。Mango banana，呢一杯特饮个杯嘅形状 好得意，好似一个灯胆咁样，芒果味同香蕉味都好香浓，系一半一半嘅 完美 比例，呢间餐厅连杯垫都一丝不苟，用咗地图嘅pattern，勾起我嘅童年回忆。All day breakfast， 个All day材料都几丰富，有墨西哥辣椒，芝士肠，烟肉，炒蛋，Portabello，香草，蕃茄同埋多士，我哋仲将个炒蛋转咗做Pesto炒蛋， Pesto个青酱味同炒蛋好夹，芝士肠食得出应该系我至爱嘅Johnsonville，仲有炒香咗嘅南瓜粒，味道相当清甜，以All day嚟讲比较少有。蒜香虾义大利面配风干蕃茄龙虾酱，呢个意粉有好浓烈嘅龙虾香味，意粉相当挂汁，蒜香味浓，虾肉爽口弹牙，加上龙虾汁嘅加持 ，真系有几分似食紧龙虾。南美香辣青柠猪腩饭 • 日本温泉蛋 • 泡菜，呢个饭有少少日韩泰 fusion嘅感觉，流心嘅日本温泉蛋， 韩国嘅泡菜，富有泰式风味嘅香辣青柠猪腩，捞埋一齐一啲违和感都无，仲 非常好味添。