翡翠拉麵小籠包 (已結業)

星期日周围都咁多人，见翡翠2位唔洗等，一入到去，正呀！有得坐搭建出来的加建座，就座落喺通道边（正确黎讲系坐喺走廊），食得咸鱼抵得渴，ok我坐。全晚侍应们服务就真系几ok，有求必应，加茶添水都好快手，落单追单都无托手踭。好，讲吓食物先，呢晚食咗：醉猪手：冷盘，酒味几浓郁，好在斩开细细件几易食，猪皮几爽口，筋位少韧，整体有咬口，但猪毛唔算去得好清。萝卜丝酥饼：上枱时有d失望，酥饼根本未够火喉，外层竟然系白色？（应该金黄色噃师傅），咬一啖，系啰！入面d萝卜丝仲硬嘅，唉⋯青菜煨面：有d惊喜，面几滑身，吸收咗高汤精华，入囗唔洗点𡁻，青菜亦淋中带爽。上海小笼包：皮薄，啖啖肉汁，肉饀嫩滑，惟稍欠鲜味。干煸四季豆：炒得几干身又唔算太油，肉碎入味，不过四季豆去豆筋去得唔清，要边食边撕走d豆筋，唉⋯（茶记食呢个𩠌都未试过要自己撕豆筋噃）。